丘梓謙大讚許紹雄風趣如親父 與麥皓兒和平分手仍有聯絡 澄清與網紅車模僅屬朋友.丘梓謙（蔥頭）喺《正義女神》入面同已故藝人許紹雄（Benz雄）同康華演一家三口，佢話角色要由15歲演到35歲，好有挑戰性，又話今次係第二次同康華做母子，上一次係2005年嘅《人間蒸發》，當時許紹雄都有份參演。
今次同許紹雄合作，蔥頭大讚對方為人風趣，又話拍攝期間三個人真係好似一家人咁喺埋一齊：「Benz哥唔熟電子嘢，會叫我幫佢搞電話Apps，啲爸爸通常都係咁，佢又成日講笑，朝頭早好攰聽完即刻醒晒！」佢坦言因為爸爸都鍾意講笑，所以覺得對方同自己爸爸好似，又話佢同許紹雄喺劇入面有場交心戲，但因為對方離世關係，自己怕勾起回憶，所以到而家都唔敢睇完整版本。
另外，蔥頭早前宣布同拍拖12年嘅女友麥皓兒分手，佢話兩個人係和平分手，當中唔涉及第三者同聚少離多嘅問題，而而家大家都有聯絡，仲話關係好似家人咁，大家都會互相關照對方嘅工作。提到有指佢疑似搭上內地網紅車模「Cy Au悠悠」，佢坦言近年喺內地發展，確實接觸咗唔同方面嘅朋友，所以多咗去睇騷，又坦言內地無論男女都好熱情，但而家自己想先專注喺事業上，感情方面就暫時唔諗住。佢又希望可以喺大灣區發展音樂事業，不過會先專注喺4月拍新劇《警是個大佬》。TVB
