胡子彤入組拍《九龍城寨之終章》打到飛起 袁澧林呻欠經費宣傳《電競女孩》.袁澧林、胡子彤以電影節大使身份，（31日）出席《超越五十︰香港國際電影節「禧紀念展開幕典禮」》活動。曾經係香港棒球代表隊成員嘅胡子彤，明言當年係憑住大膽嘗試，拍攝電影《點五步》而入行：「我都係搏！冇諗到行到今時今日，近排喺球場、片場都搵到活着嘅感覺，好正！」
胡子彤除咗演員身份之外，近年仲唱歌做埋歌手，問佢有冇興趣做導演，佢笑稱短期內唔會，深知做導演唔容易，要涉獵太多範疇：「暫時專注眼前工作先！」講到近況，佢嘅歌曲《我獨自升級》前排出咗街，佢喺四月中就開工拍攝電影《九龍城寨之終章》：「而家開始練動作，今次比上一集打得勁，件衫一樣咁厚，長期着皮褸，懶有型啦！今次好多夏天室外景，動作指導谷垣健治話會辛苦啲，除咗練動作，都加咗練體能。」
袁澧林就話《電競女孩》以戲中金句「明知輸都要打」鼓勵電影業，明言業界處於艱難階段，話：「要打，都要知點樣贏，係電影人共同精神。」提到一班演員為呢套戲落力謝票，袁澧林坦言缺少宣傳經費，惟有借助網民力量得到關注，笑住話：「前幾日去謝票，睇到戲院已經加咗場次，好開心！而且聽到好多好評。」佢透露四月會拍新戲，不過暫時未能透露詳情，大賣關子話所演嘅角色同以往有別：「會令人眼前一亮。」
