林峯稱身體無恙睇中醫調理 安排女兒探班：等佢知道爸爸搵錢辛苦.林峯（31日）現身九龍塘出席「細味香港·細膩茶感」香港製造百人誌嘅揭幕禮，同場仲有攝影師Jimmy Ming Shum，吸引咗大批粉絲同市民圍觀。活動上，林峯同市民玩「鏡環捕捉」遊戲同送禮物。農曆年後首次亮相公開活動嘅林峯，受訪時話前一晚通宵工作，為咗今次活動今朝好早就起身，笑言有Jet lag狀態。對於早前被網民影到佢同古天樂、宣萱「合體」進行拍攝工作，林峯故作神秘話：「拍緊啲嘢啦！（廣告？有關《尋秦記》？）唔關事㗎，遲啲會公開，等官方通知，等我老闆（古天樂）同家姐（宣萱）佢哋講。」三人縱使各有各忙，都會約食飯「合體」。
提到TVB播緊嘅劇集《尋秦記》進入結局階段，一班演員約埋喺4月7日一齊睇大結局，林峯對此大表期待：「對上一次同大家一齊睇電視劇，已經係十幾年前《家好月圓》，好多回憶！」佢透露電影《九龍城寨之終章》就快開拍，早前頻頻健身。明顯比之前大隻咗唔少嘅佢話：「我哋城寨四子身形都變得健碩，大家都好努力增肌；對腳都有操，因為劇情有好多奔跑、打鬥，如果下盤唔穩，打就會有危險。」提到日前被粉絲喺街頭捕獲去睇中醫，面容憔悴，佢急急澄清：「我冇事，只係睇中醫調理，不知幾精神。」提到古天樂、宣萱喺電視劇《刑事偵緝檔案IV》嘅錫錫片段近日喺網上瘋傳，林峯笑住話：「我唔睇呢啲嘢！哈哈！」對於網友讚兩人合襯，林峯話：「拍戲啫，一個阿哥一個家姐，我覺得件事好笑囉！」
問到會唔會趁復活節假期同妻女出去玩，林峯話一早為佢哋安排咗節目：「就係去片場探我班！」佢話《九龍城寨之終章》比之前規模更加大，更加真實：「而家天氣開始熱，拍攝工作會比較辛苦，等阿女知道爸爸搵錢唔容易！我拍第一集《九龍城寨之圍城》嗰陣，個女仲好細，睇到我俾人打會喊。而家大個咗，變得大膽，知道係拍戲啫！」佢話5歲嘅女兒Luna對身邊事物充滿好奇：「會有十萬個為甚麼！有時我都唔敢亂答。」直言都係留返畀老師教好啲。
