佘詩曼譚耀文相隔22年再合作 自爆拍《新聞女王》曾因雜聲「發火」.佘詩曼、譚耀文、陳煒、周嘉洛、文頌嫻及馬貫東等昨晚（30日）到紅磡出席新劇《正義女神》首播活動，吸引大批粉絲到場支持，眾演員行紅地氈進場。
佘詩曼（阿佘）同譚耀文受訪時話22年前曾經合作過《無名天使3D》，譚耀文話雖然多年冇合作，但再合作都冇隔膜。阿佘笑指當年角色潑辣，會逼對方打麻雀，不過今次就好斯文。問譚耀文現實中係咪有同阿佘打過牌，佢話自己唔敢挑戰，因為對方牌技高明，但阿佘就踢爆其實係對方好忙，連約一班演員食飯都約咗好耐。劇中兩人飾演離婚嘅夫妻，但因為工作關係成日會碰面，問到有冇親熱戲，譚耀文話只有一場阿佘挨落佢膊頭嘅戲，至於係咪太太唔批准，佢坦言太太都係阿佘嘅粉絲，應該冇問題，又透露太太趁復活節假期同女兒去旅行，但自己要做嘢所以冇份，笑話會趁呢段時間叫阿佘請食飯，仲大爆拍攝嗰陣，阿佘早午晚三餐都萬歲，仲試過一人請食一隻雞。阿佘話因為開工辛苦，所以慰勞大家，而譚耀文就請飲奶茶咖啡。
阿佘之前話因為演法官，所以喺片場要保持嚴肅，譚耀文話佢因為有好多劇本要背，所以好緊張，阿佘都話因為太多嘢要處理，所以唔得閒笑。問到有冇試過因為被人騷擾背對白而發火鬧人，阿佘坦言拍第一輯《新聞女王》嗰陣試過：「第一場外景現場報新聞，已經好緊張，啱啱開機就怕火燭嗰場，現場好多人，隔籬啲記者要演記者嘅戲，但我又要對住鏡頭喺度背一啲新聞報道嘅稿，其他演員喺隔籬不停講，我嗰下真係忍唔住話『可唔可以靜一靜？我真係唔得呀』，因為雜聲好多，但人哋都要演戲，但我嗰下真係忍唔住，因為唔記得晒自己講咩。」佢話都有同對方講唔好意思，因為自己好緊張。
另外，有網民擔心《正義女神》喺現階段播出，有機會影響阿佘再奪視后嘅機會，佢話最重要係觀眾欣賞作品：「獎項唔係話唔重要，係bonus，最緊要大家鍾意睇我哋部戲，其他嘢唔理咁多住。」TVB
