劉展霆護Yumi否認戀情：公司有叫我檢點啲 認情人節送萬元手鏈 與對方仍有聯絡.「聲夢小花」鍾柔美（Yumi）早前錯手喺網上分享同緋聞男友劉展霆（Eden）嘅攬錫片，之後又戴上疑似男方送嘅情人節手鏈，不過Yumi事後對感情封口。而Eden昨晚（30日）出席《正義女神》首播活動時，就開腔回應事件。
Eden用「好好好好朋友」嚟形容Yumi，話兩人嘅關係唔係由《青春本我》開始，而係因為交流跳舞：「我跳breaking，對jazz、hip-hop啲舞唔太熟悉，有時會問吓佢。」提到Yumi誤貼兩人嘅親密短片，Eden話因為同Yumi都係12月9日生日，當時係一齊慶祝，加上係聖誕節所以情緒高漲，玩得比較high所致，又承認公司之後有叫佢「檢點啲，唔好玩得太過火。」提到Yumi經此事後，以前嘅戀情被踢爆，更被指係大話精，問到有冇安慰對方，佢話：「作為好好好好嘅朋友，身邊嘅朋友困難或者唔開心，關心吓都應該。」至於係咪同Yumi拍拖，Eden聽後即刻話：「唔係，（從來都冇？）冇冇冇冇冇。」
提到佢疑似送咗一條過萬嘅手鏈俾Yumi，佢直認係自己送，因為覺得條手鏈好襯對方，又話自己好珍惜好朋友，都送過電話俾李紹堅，更話身邊嘅人對佢好，自己就會對人好。對於情人節送禮日期敏感，佢話：「我都覺得自己係做錯咗，但係一個朋友身份去送，我覺得好襯佢，（但係情人節！）因為我真係諗唔到送條鏈係咩節日送，（係咪想表白？）唔係！（情人節送禮物怕唔怕女仔誤會？）我又冇諗咁多，我都好錫身邊嘅朋友。」至於公司有冇叫佢唔好拍拖，佢話冇，又話而家同Yumi仲有聯絡。TVB
