麥明詩離巢後首返無綫拍新節目 怕兒子步後塵留黑歷史：十優相係陰影.麥明詩（Louisa）與林溥來（Patrick sir）主持嘅無綫新節目《AI時代，未來實習生》今日（8日）喺將軍澳電視城舉行記招，請來陳山聰、陳展鵬、賴慰玲三位星級父母帶埋小朋友一齊參與，分享兒時夢想。麥明詩離巢後首次「回娘家」拍節目，佢話係獲《後生仔傾吓偈》監製同廣告客戶邀請，加上題材關於小朋友，當然都要努力賺奶粉錢。重回舊地雖然迷路，但見到以前嘅工作人員都覺得開心親切。
麥明詩透露節目中未有讓囝囝出鏡，因為年紀太細，將來會唔會出鏡就要睇佢意願。佢話自己細個拍嘅相片同片段往往成為「黑歷史」，令人後悔，更自爆：「自己都好後悔，當年上報紙嗰張十優相不修邊幅、又肥、又滿面暗瘡，令我留有陰影。我明白兒時嘅情況對一生有莫大影響。」講到近況，除咗湊仔，佢繼續喺教育機構工作，都有帶囝囝返工。最近佢分享囝囝接觸爸爸嘅飛機師器材，問到係咪想培養佢做飛機師，麥明詩話：「最好唔好，通常父母做嗰行都唔想小朋友做。30年後都唔知係咩世界，可能飛機師已經喺地面控制。」問到想個仔將來做咩，佢笑言：「最緊要娶個好老婆，好似佢爸爸咁。人生最緊要嘅決定就係另一半。」至於追多個，佢話：「想㗎，因為爸爸之前考試好忙，𠵱家先有啲喘息空間，但佢成日唔喺香港，撞唔中黃金時間，不過都進行中，哈哈。」
陳山聰同陳展鵬就分享仔女喺節目中嘅夢想實踐。山聰話接邀請先知囝囝Jaco想做獸醫，感到意外但會支持。展鵬嘅女女「小豬比」如願做幼稚園老師，但展鵬唔贊成佢做童星，要佢讀完書先：「依家拍嘢咪唔使讀書，我第日仲要佢養我㗎。」另外，無綫周年報告未見山聰蹤影，佢笑話若然有問題就唔會現身，解釋經理人約轉到邵氏，𠵱家同無綫係部頭合作；展鵬就透露下月開拍新劇同綜藝節目。TVB
