愛回家｜滕麗名金像獎臨危受命頂替頒獎 劉丹隔空慰問鼎爺：希望佢精神返.《愛．回家之開心速遞》今日（8日）喺將軍澳電視廣播城舉行「齊迎母親節」活動，劉丹、滕麗名、呂慧儀、單立文、樊亦敏、林淑敏、袁文傑、許家傑、林凱恩、羅樂林、陳俊霆、李偉健、焦浩軒、湯盈盈、張景淳、歐瑞偉、蘇恩磁、姚瑩瑩等一齊出席，場面熱鬧。
滕麗名早前首度憑電影《尋秦記》入圍香港電影金像獎最佳女配角，雖然未能獲獎，但佢強調冇失望，仲話好開心可以參加呢個大派對：「我都話參與已經當贏咗！同埋著得靚靚，影咗咁多靚相都好開心。」當晚頒獎禮安排佢同《尋秦記》中飾演李斯嘅陳國邦拍檔揭曉最佳音響效果，滕麗名自爆原本唔係佢做頒獎嘉賓：「其實本來都唔係我嚟嘅，因為有個嘉賓突然病咗，咁就頂替嘅啫！」問到原本係邊位，佢反一反眼笑話：「我唔知喎！」
對於拍檔李泳豪同爸爸李家鼎嘅家事成為全城熱話，呂慧儀指豪仔一直有開工，但未來幾日就唔使錄影。問到對方情緒，佢話：「佢OK嘅，其實佢好成熟、好穩重，做嘢嘅時候就做嘢，所以冇乜特別需要人擔心。佢會照顧好自己、爸爸同老婆，我覺得已經夠啦！」
丹爺劉丹認識鼎爺多年，問到鼎爺同大仔李泳漢父子關係決裂，丹爺一臉難過話：「唉……個心梗係唔舒服，唔使講啦。特別係，其實我同鼎爺大家都差唔多年紀，我大佢幾歲咋，喺呢個時候遇到啲咁嘅嘢，的確係幾心煩。咁都冇辦法，總之我都會托你哋啲行家幫我問候鼎爺，因為我都好耐冇見佢，更加冇撞到豪仔，希望佢一切放鬆啲、精神啲。我睇相佢最近好似憔悴咗好多，希望佢精神返。」呂慧儀都希望鼎爺加油，唔好被分擾影響。
丹爺仲自爆原來曾經都俾人叫「頂爺」！話說70年代中期，劉丹喺佳藝電視拍咗一套劇《頂爺》，喺佳視算係收得，於是通街啲人都叫佢頂爺。後尾跳槽過TVB，TVB已經有個「鼎爺」，大家就改口叫佢「丹爺」至今。劉丹話同鼎爺已經好多年冇見，希望對方可以開開心心生活。TVB
