十大中文金曲2026｜陳康堤首度認愛網球一哥黃澤林 奪新人金獎靠重溫賽事慶祝
「第47屆十大中文金曲」頒獎音樂會昨晚（24日）喺東九文化中心舉行，樂壇新星陳康堤（Constance）勇奪「最有前途新人獎」金獎，成績斐然。頒獎禮後，康堤大方受訪，除咗分享獲獎喜悅，仲首度公開承認與香港「網球一哥」黃澤林（Coleman Wong）嘅戀情，全程笑到見牙唔見眼，甜到漏。
康堤透露，得獎後好肚餓，最想食零食同杯麵慶祝。講到爸爸陳奕迅嘅鼓勵，佢話Eason叫佢繼續做好自己，冇施加任何壓力，令佢可以輕鬆面對。至於會唔會同男友一齊慶祝，康堤就話男友目前身處外地比賽，得獎後已收到對方「你好叻」嘅短訊，冧到爆，之後會靠重溫賽事片段來慶賀，正式認戀。
對於有傳父女檔將首度合體亮相內地音樂節目《國粵無雙》，康堤話暫時未收到消息，睇吓之後有冇安排，坦言希望將來喺音樂或影視上同爸爸合作，形容兩人平時相處似朋友，即使合作都會提出自己意見。佢更透露，每次認識新對象都係經家人介紹，今次同黃澤林都唔例外，但強調完全冇刻意安排。
