戴祖儀變「心胸豁達」放下被包養傳聞 倪嘉雯自認無殺傷力唔爭C位.戴祖儀同倪嘉雯今日（25號）到將軍澳出席《正義女神》「兩神對峙 詭辯之才」宣傳活動。戴祖儀近日因工作忙，加上跟陳煒一齊做Pilates，腹肌突飛猛進，仲練出少少人魚線，今日特意著露腰裝大晒成果。早前佢透露有女藝人唱佢被包養，曾經話會搵對方當面對質，問到後續如何，戴祖儀話自己而家低調咗，心胸豁達，覺得控制唔到別人不如改變自己，繼續正能量就開心。問到係咪轉而求姻緣，佢話姻緣愈渴求愈冇，所以唔渴求：「自己單身一段好長時間，好享受自由自在，習慣咗屬於自己嘅時間。」佢透露一直有人追同約食飯，但工作太忙無法應約，希望將來遇到自己鍾意、會當佢公主咁錫嘅真命天子。
另外，早前陳奐仁爆料《魔音女團》有女團員撥頭髮爭出位，仲出現兩位嫌疑人物陳熙蕊同俞可程。身為魔音女團一份子嘅倪嘉雯就話，自己嗰組冇撥頭髮事件，覺得如果solo撥頭髮或單眼都冇所謂，暫時唔知嫌疑人是誰：「我嗰組好和平，但唔可以劇透組員名單。」提到嫌疑人之一陳熙蕊，倪嘉雯話同佢第一次合作，覺得16個女仔冇大家想像中咁多是非，好和諧，每日排舞、唱歌同瞓覺，冇時間搞呢啲嘢，大家一致想跳好舞步，未感覺到。問到擔唔擔心有人爭C位，佢話：「佢哋爭得喇！有能力應該畀C位，我跳舞同唱歌比較差，喺後面已經好滿足，我對住鏡頭單眼好似痙攣。（你冇殺傷力冇咩人同你爭？）對呀！拍攝時幾開心，好似識咗一班好姊妹。」戴祖儀忍唔住幫口解畫，話可能有頭髮插到眼就可以加入動作。倪嘉雯仲大讚另一嫌疑人俞可程好努力，會督促大家跳舞，但冇留意佢有加動作，因為自己只關注自己。TVB
