《夜王》超越《九龍城寨之圍城》 史上最賣座 港片三甲全屬黃子華天下.吳煒倫執導嘅億萬賀歲片《夜王》，今個月加推三級導演版（Director’s Cut）。前晚電影公司喺尖東舉行慶功宴，導演吳煒倫、主角「歡哥」黃子華率領台前幕後一齊慶祝票房持續上升，預告將會登上史上港產片票房第三位，子華神更定下目標，要《夜王》超越《毒舌大狀》史上最賣座嘅冠軍紀錄。
導演版上映成功刺激票房，《夜王》由黃子華、鄭秀文（Sammi）、何啟華（Dee）、李芯駖、廖子妤（Fish）、盧鎮業（小野）、楊偲泳（Renci）、譚旻萱（Mandy）、林熙彤、楊偉倫、鄧麗英等合演。導演版比原先版本加長咗30分鐘，連盧慧敏（Amy Lo）被刪走嘅戲份都重見天日，佢飾演太子峰嘅妹妹Ella，令《夜王》呈現出一個更圓滿嘅版本。
截至今日（25號）上午，《夜王》港澳累積票房已衝破1.13億，成功取代《九龍城寨之圍城》，成為史上港產片票房第三位。而本地影史最賣座華語片頭兩位順序係《破·地獄》同《毒舌大狀》，換言之，三甲電影全部都係子華神嘅天下，認真犀利！
