陳詠詩樣貌疑再進化 親自解畫：絕不會微調.《2026香港小姐競選》全球招募最後召集，今晚（22日）多位師姐現身將軍澳分享參選經歷及面試心得。2025年香港小姐冠軍陳詠詩今晚收起性感，以女神造型現身。久未露面嘅佢輪廓分明，樣貌被指疑再進化。問到係咪變靚咗，陳詠詩話唔係，可能因為化咗妝，自己鍾意嘗試唔同妝容，強調絕對唔會微調。被問到係咪想改變一下乖乖女形象，佢話：「睇吓點睇，選美時就有人話我豪放啦！」至於男友有冇讚佢靚咗，佢話：「男友不嬲都讚我靚，話全世界最靚。」
即將卸任嘅陳詠詩會等待公司安排工作，想嘗試拍劇同做司儀。佢透露正攻讀博士課程，關於教育及人工智能，希望等緊工作嘅同時自我增值。問到係咪想學麥明詩進軍教育界，佢話：「都有興趣，好想幫小朋友，對慈善都有興趣。」佢仲話妹妹仍在讀書，未決定會否參選，不過今年機會應該唔大。TVB
