康堤唱功屢遭網民狠批 森美力撐：陳奕迅啱啱出道都有好多批評
星二代一舉一動向來係外界焦點，歌神陳奕迅（Eason）嘅愛女康堤近年進軍樂壇，唱功同舞台表現一直備受關注。不過網絡上對佢嘅評價兩極，甚至有唔少網民留下大篇幅負評。日前更有網民「考古」，翻出廿幾年前Eason喺訪問中批評當年樂壇嘅影片，藉此諷刺康堤現時嘅表現，令話題再度發酵。
森美今日（22日）現身無綫節目宣傳活動，接受《香港01》訪問時，被問到點睇康堤近期承受嘅輿論壓力，以及網民借Eason舊片狙擊嘅現象。森美大方分享自己嘅看法，對呢位樂壇新秀表達理解同鼓勵。
森美坦言有留意相關新聞同評論，但認為大眾應該給予新人更多空間：「康堤作為啱啱升格嘅『生力軍』，然之後又參加咗《拉闊》演出，以佢第一次正式表現嚟講，我敢寫包單，我覺得其實已算唔錯。」對於網民質疑康堤唱功，森美分析指康堤嘅唱腔並非現時主流嘅傳統流行曲（Pop）唱法：「大家對佢唱腔嘅接受程度可能冇咁高，係因為佢嘅風格唔係平時典型、好Pop嗰種演繹方式。要投入、欣賞呢種唱法，係確實需要一啲時間。」
森美續指，現場表演本已充滿挑戰，加上康堤入行日子尚短，要喺大型騷表現自己，同時面對緊張情緒同有限嘅籌備時間，甚至要演繹他人嘅作品，喺呢啲限制下完成演出，表現已相當難得。
講到網民翻出Eason廿幾年前嘅言論抨擊康堤，森美不禁笑言，陳奕迅喺大家心目中嘅地位確實「太厲害、太強大」，無形中為康堤帶嚟極大壓力。但佢隨即以此勉勵康堤，指出即使係今日嘅「歌神」，當年都係從批評中走過嚟。森美回憶：「大家唔好忘記，Eason以前啱啱出道嘅時候，其實外界對佢有好多唔同、甚至係唔好聽嘅批評。但佢都一步一步、一啲一啲咁去累積，先變成今日大家眼中、金剛不壞之身，成為厲害嘅歌神。其實每個人都需要時間成長。」
