佘詩曼51歲生日飯局停不了 獲視帝小生包圍慶祝超幸福：另一個開心嘅夜晚
視后佘詩曼（阿佘）本月28號迎來51歲生日，雖然未到正日，但人緣極佳嘅佢已經慶祝飯局停不了。繼早前同「七魔女」等好姊妹聚會後，尋日（22日）阿佘再喺社交平台分享另一場生日派對嘅靚相，見佢獲多位圈中好友提早慶生，阿佘開心留言：「又係另一個開心嘅夜晚。」
從相中可見，今次派對星光熠熠，出席嘅圈中好友包括近期合作《正義女神》嘅周嘉洛、蔣祖曼同馬貫東，仲有朱敏瀚、陳山聰、謝天華同郭政鴻等，場面非常熱鬧。其中只得朱敏瀚似乎未曾同阿佘合作拍劇，唔少網民都猜測兩人係咪即將有新合作。另外仲有兩位視帝級人馬陳豪同馬國明都有到場，成班「男神」圍住阿佘，成個派對洋溢住歡樂氣氛。
飯局其中一個亮點，係一個以法律為主題嘅生日蛋糕，上面飾有法官公仔、法槌同厚厚嘅法律書籍，設計相當精緻，明顯係呼應阿佘喺《正義女神》入面嘅「言官」角色，極有心思。阿佘亦童心未泯，拎起寫住「佘詩曼生日快樂」嘅朱古力牌同傳統壽桃包合照，流露出可愛一面。TVB
