試真D丨江美儀批海鮮似灰甲惹爭議 一句觸動神經：唔好評論我媽媽.無綫綜藝節目《試真D》由江美儀帶住一班小鮮肉周圍試伏，話題十足。日前（16日）嗰集，江美儀、周嘉洛同曾展望（GM）去到惠州雙月灣實測一個叫價只係118元人民幣嘅海鮮團購餐。江美儀因為狠批海鮮質素差，爆出「灰甲」論，引嚟網民熱議。有網民仲喺Threads發文對佢人身攻擊，搞到江美儀罕有現身反擊。
節目中，江美儀實測標榜「7餸海鮮餐」嘅團購套餐，點知上枱嘅海鮮唔止份量縮水，仲係殼多過肉兼且「凍冰冰」。美儀姐全程面燶燶，對住賣相欠佳嘅海鮮爆出「Mean爆」金句：「啲海鮮灰甲咁！」因為店員對待團購客同現場客態度「大細超」，加上解釋錯漏百出，令要求極高嘅江美儀當場扯火，對住鏡頭高聲話：「我直情覺得要處理吓呢件事！」節目出街後，雖然大部份網民讚佢敢言、夠膽揭露黑幕，但都有酸民持反對意見。
有網民喺Threads發文批評江美儀評論過火，留言仲涉及侮辱家人：「咁大個人都唔用腦嘅，兩舊水唔使俾咁多嘢妳食？（人啊媽就生個諸葛亮，妳啊媽就生個G一樣）」向來硬淨嘅江美儀見到之後，即刻親自喺個帖文下面回覆表達不滿：「多謝你，你可以評論我，但請你不要評論我媽媽。」江美儀高EQ嘅回應瞬間獲過萬人點讚，大批網民入場撐美儀姐：「好睇呀，我撐你呀，平都預咗（質素差），但起碼食得落口，唔係臭嘅」、「你有嗰句講嗰句無問題呀」、「支持講真話」。雖然支持者多，但都有部份網民對兩邊都反感，留言話：「你話人媽媽，唔見得你又有好家教」，令網上罵戰越演越烈。
