金像獎2026紅地氈懶人包｜直播連結、時間、地點、焦點提名.全城矚目嘅影壇盛事——第44屆香港電影金像獎，將於今個星期日（4月19日）假香港文化中心隆重舉行。當日下午4時30分，一眾電影人、頒獎嘉賓、提名演員及幕後精英將會盛裝亮相，踏上設於尖沙咀海濱長廊嘅紅地氈，為頒獎典禮揭開華麗序幕。ViuTV 99台將由下午4時30分起全程直擊紅地氈盛況，《星島頭條》亦將直擊紅地氈環節。
金像獎2026紅地氈詳情
第44屆香港電影金像獎紅地氈嘅網絡直播將由下午3時30分搶先開始，觀眾可透過「香港電影金像獎」及「SpotiTalk」嘅官方YouTube頻道，直擊紅地氈嘅台前幕後。大會今年邀得全新主持陣容，由身兼演員及主持嘅吳肇軒、網絡名人筆華棋（Matt Chung），搭配三位新面孔「葵芳」Kay蔡蕙琪、Angelina趙君瑜及連花（KaLin），以獨特視角帶領觀眾「UNLOCK紅地氈時刻」。
屆時，預計一眾獲提名嘅影帝、影后、最佳男女配角、新演員候選人，以及多位著名導演、編劇及電影工作者將會現身，星光熠熠，絕對係年度最不容錯過嘅娛樂盛事。
金像獎2026焦點提名電影與演員
今屆金像獎競爭激烈，多部電影作品備受矚目。由麥浚龍執導嘅《風林火山》以12項提名領跑，成為大熱；而《尋秦記》、《金童》、《再見UFO》、《世外》及《醬園弄‧懸案》亦成功入圍角逐「最佳電影」殊榮，實力不容忽視。
演員獎項方面，戰況同樣精彩。古天樂憑《私家偵探》及《尋秦記》兩部電影雙料提名「最佳男主角」，將與《金童》嘅張繼聰、《捕風追影》嘅梁家輝，以及憑《像我這樣的愛情》首度入圍嘅陳家樂，一同競逐影帝寶座。影后寶座之爭亦相當激烈，入圍者包括《水餃皇后》嘅馬麗、《無名指》嘅許恩怡、《像我這樣的愛情》嘅廖子妤、《醬園弄‧懸案》嘅章子怡，以及《贖夢》嘅陳法拉，五位實力派演員將爭奪影后殊榮。
