43歲視后李佳芯強勢進軍影壇 獲徐淑敏老公黃浩賞識簽三部電影約.43歲視后李佳芯（Ali）舊年宣布離開效力多年嘅TVB之後，唔單止積極轉型開YouTube頻道同自組工作室，仲獲前港姐徐淑敏（現名徐菁遙、Suki）嘅商人老公黃浩賞識，一簽就係三部電影合約，強勢進軍電影界。
黃浩近日再有新動作，宣布已獲「Black Deer Entertainment」創辦人兼管理合夥人Poya Shohani正式確認，達成27億港元嘅合作計劃，聯手打造東西方文化交流嘅文化娛樂、藝術同體育產業版圖。
黃浩受訪時話好開心今次同Black Deer Entertainment合作：「我覺得香港有好多IP，好多題材可以發展，全球華人市場好大，我哋想拍東西方都有興趣嘅內容。除咗製作電影，仲會拍電視劇，電影仲會安排喺串流平台播出。」佢仲話Black Deer Entertainment係主要投資方，擁有話事權，不過佢哋已經說服對方拍劇，而且大部分戲都會嚟香港拍，所以喺亞洲區用咩演員或者喺邊度拍外景，佢都有得畀建議。
黃浩又提到，由於好多戲劇都以英語為主，所以會搵啲英文流利嘅演員，好似伍允龍、張曦雯都會合作。佢仲話：「佢哋對李佳芯都好有興趣。」而家正同藝人斟洽中，希望可以促成合作。
至於Black Deer Entertainment回覆香港傳媒時亦證實與黃浩有合作，已簽署初步協議。據報道指，呢個計劃由前瑞銀投資銀行家蘇漢明參與促成，目標係結合東西方經典IP，例如將「蜘蛛俠」、「蝙蝠俠」呢類超級英雄概念，同中、港、日、韓等亞洲地區嘅經典IP融合，製作成面向全球發行嘅亞洲版英語荷里活電影。
呢次合作將會同香港上市公司聯手，利用其發行網絡將作品推向內地及亞洲市場。除咗電影製作，計劃仲涵蓋相關商品開發，期望全面重振香港影壇嘅國際影響力。
