李佳芯入圍「最佳新演員」當拎影圈入場券 視后心態歸零
憑電影《金童》入圍第44屆香港電影金像獎「最佳新演員」嘅李佳芯（Ali），佢形容今次提名就好似攞到張「入場券」，代表自己正式踏入電影圈，仲話喺電影世界裏面會用「歸零」嘅心態重新學過。Ali喺2018年憑劇集《BB來了》封視后，之後拍過《白色強人》、《愛美麗狂想曲》同《智能愛人》等多套劇集，演出好受歡迎，演技一早獲肯定。
2024年底離開TVB之後，Ali自己開工作室，積極參與唔同新挑戰。踏入2026年就迎來好消息，當見到自己個名喺金像獎提名名單上面，Ali直言好意外：「第一下反應完全估唔到！但更大嘅諗法係一個提醒，呢個提名提醒我，無論演咗幾多年戲，喺電視圈做咗幾耐都好，我都係一個新人。唔單止喺電影圈係新人，連演繹節奏上都係新人，成個人裏裏外外都要重新學過，呢樣嘢係一個幾好嘅提示，提醒我去到邊個年紀，都要有歸零同重新學習嘅心態。」
今次獲提名，佢形容感覺就好似拎到一張入場券，踏出電影嘅第一步：「我好想用入場券嚟形容呢個提名，感覺係話畀自己知，你有一張入場券，代表你曾經有一個作品得到提名，拎住呢張入場券，你可以行入去。」如果將今次提名當作一封信，信入面嘅內容又會想同Ali講咩呢？Ali話：「如果係一封信，我覺得佢想話我知，經歷咗咁多年，終於有入場券，正式成為一分子，之後要用全新嘅態度、思維、狀態去迎接全新嘅領域，繼續尋找、發掘一個全新嘅自己，然後去適應將來遇到嘅每一個角色。」
Ali對闖入影圈充滿夢幻感覺，笑言最想挑戰人性題材嘅作品或者角色：「我特別鍾意人性題材，因為我覺得每一個人都過得唔容易，可能入面有好多經歷，同一個人都有好多身份同角色，對父母、對上司，呈現出嚟嘅狀態都可能唔一樣，人嘅闊度可以好大。我好鍾意演有深度、多變化、能夠反映人物多面向嘅角色，例如心理醫生、精神病患者，又或者一啲倫理關係、比較錯綜複雜嘅情感，或者需要極端情緒嘅角色，我都好有興趣，好想挑戰。」
講到對電影未來嘅心態，Ali坦言而家嘅心態好似一張白紙，好想一切歸零，唔再好似以前咁樣畀太大壓力自己，而係選擇專注每個當下，將壓力變成動力。佢話：「以前好緊張，好驚做得唔好，而家嘅心態比以前清晰好多，唔會再帶住太多負擔。我會選擇用全新嘅視野，要克服自己畀自己嘅壓力，希望只係做好眼前每一個moment，好好享受每個角色。」TVB
