专访丨滕麗名首戰金像女配平常心應戰：提名已經係成就解鎖.《第44屆香港電影金像獎》今個禮拜日（4月19日）就喺尖沙咀文化中心舉行，到時邊個攞獎自有分曉。今年「最佳女配角」嘅競爭特別激烈，入行30年嘅滕麗名要同後起之秀鄧濤，一齊挑戰攞獎無數嘅鮑起靜。面對呢班影后級人馬，滕麗名對攞獎與否抱住平常心，覺得有提名已經係一種肯定，當係自己演藝生涯嘅成就解鎖！
當年參加《新秀》入行嘅滕麗名（阿滕），轉戰電視圈之後拍過唔少經典劇集，包括《陀槍師姐》、《真情》、《愛·回家之開心速遞》同《尋秦記》等等。今年啱啱「入五」嘅大日子，仲憑住電影版《尋秦記》入圍金像獎「最佳女配角」，呢個好消息令佢大感驚喜！其實阿滕早喺入行初期已經同影圈結緣，拍過《四個32A和一個香蕉少年》同《天涯海角》，只係相隔多年，6年前先重返影壇拍攝《尋秦記》。
今次出戰影壇頒獎禮，阿滕直言感覺好特別，覺得時間啱啱好：「真係意料之外，估唔到30年後可以重返大銀幕，多謝古老闆（古天樂），唔係佢，電視版就唔會變成電影版，仲可以召集返咁多人一齊拍，感覺有少少夢幻。」面對入行60年嘅影后鮑起靜今次「降呢」做綠葉，憑《風林火山》同佢拗手瓜，阿滕抱持平常心爭獎：「對手好強勁，喺我演藝生涯嚟講已經成就解鎖喇，入圍係肯定，亦覺得好榮耀，就好似當年《新秀》嘅對手係陳奕迅咁！」
問到有冇信心攞獎，阿滕坦言：「梗係想啦，想攞個獎多謝古老闆，為大家帶嚟美好嘅回憶。今次我哋成班演員個個緊守崗位，真係好耐冇見過咁有熱誠嘅團隊。其實相比起個人獎項，我更想套戲攞『最佳電影』。」問到到時會唔會邀請好少露面嘅老公一齊行紅地氈？佢笑住話：「我有叫㗎，但佢已經拒絕咗我，話會喺屋企支持我喎！」仲透露會度身訂造戰衣：「一定唔係行性感，Keep住『善柔』（《尋》片角色）Mode，呢個都係我個Mode，哈哈！」
至於鮑起靜而家身處馬來西亞拍攝電影《永不言棄》，相信要奮戰到最後一刻先可以返香港出席盛會。佢喺2009年憑《天水圍的日與夜》榮膺金像獎影后，多年來先後憑多部電影6次角逐「最佳女配角」，可惜全部落空。今次捲土重來，喺《風林火山》有破格演出，飾演一名精通槍械改裝嘅專家，身份神秘，完全顛覆以往「御用阿媽」嘅形象，仲同古天樂、金城武等男神鬥戲，夾雜粗口對白兼氣場十足，自然被睇高一線！佢接受訪問時話：「喺電影世界入面，我係名副其實嘅女配角。呢套戲拍完幾年，好記得係我『第一次講粗口』嘅作品，感覺幾新鮮。」至於阿滕另一個勁敵鄧濤，喺《女孩不平凡》入面同女拍檔有激情床戲，同時角逐「最佳女配角」同「最佳新演員」，佢謙稱演出仲有不足，今次能夠加入團隊已經好似中咗六合彩咁開心！
TVB
