節目巡禮︱俞可程谷爆湯碗胸 何沛珈轉玩「背多Fun」. 俞可程同何沛珈現身《2026TVB年中節目巡禮》，俞可程著低胸裝谷胸上陣，何沛珈就大露背玩「背多Fun」。俞可程早前喺《魔音女團》12強止步，坦言有唔開心，但覺得自己進步空間好大，大讚16個女仔都好犀利，自己12強已經當贏咗，希望下次再有機會。問到會唔會再有女團機會，佢話坊間好多傳聞，聽講有《魔音女團2》，如果多一個團會好開心，因為16個女仔都可以繼續進步。雖然失落女團，但俞可程仲有《女神配對計劃2》，笑言可以奉旨揀男仔。
何沛珈就話想互相追求，唔想單方面被追，但現實未試過主動追男仔。早前佢哋偷睇求愛勇者面試，各自都有一、兩個心水。對於有19歲男生參加，何沛珈話對方細自己十年，有三個generation gap，差距好大。俞可程就話自己鍾意年紀大嘅男生，過往拍拖對象都大過佢。問到大隻仔會唔會加分，何沛珈話太大隻有壓迫感，合眼緣最重要。俞可程主動提到報名仲未截止，呼籲有心人快啲參加。TVB
