藝人葉璇父親年前傳出患癌消息，她即放下一切陪伴醫病，可惜父親去年終敵不過病魔離世。她透露最近忙於為遺產事宜奔走，更捲入爭產風波，與繼母慘成被告，最心痛的是父親至今仍未能入土為安。
女星葉璇（Michelle）年前得悉父親腹痛持續40多天，有感事態不妙，急送對方到醫院接受檢查，結果證實患上胰臟癌，她隨即安排父親來港就醫。當時她在直播中指負責照顧父親的「保母」趁機搶家產，對方更不斷詆毀她，為免節外生枝，她對「保母」百般忍耐，並曾揚言對父親的家產沒興趣，只想父親健康。
低調盡孝的Michelle陪伴父親走過餘生，去年中喪父後心如刀割。回望陪伴時光，她認為當時叫停事業及背負生活重擔亦是值得的，她哽咽憶述：「咁多年我哋喺埋一齊生活，最長時間可能只得10日，陪佢醫病嗰段日子，彼此都加深咗了解。」父親離世後，她的壓力未有減輕，她指「保母」實為父親的紅顏知己，對方施計轉走其父半份身家，更有葉家祖墳地契在手，但仍就餘下的遺產反過來控告葉璇與其繼母！
Michelle透露近日忙於為遺產一事打官司：「已經進入司法程序，我唔可以講太多，不過嗰個人（指『保母』）唔知我爸爸根本冇同繼母離婚，喺內地婚內財產好受關注，我哋好有信心攞得番應得嘅。爸爸走之前都交代咗後事，佢畀咗好多嘢我，但我覺得繼母同我細佬遭遇好慘，畀人離間咗同爸爸嘅感情，所以我分咗屬於自己應得嘅畀佢哋，只係攞番有紀念價值嘅嘢，包括我載爸爸去覆診用嘅殘車。」
她表示父親離世後才知道他身家如此豐厚，但深信金錢非萬能，所以最心痛的不是失蹤的遺產，而是父親至今依然未能落葬祖墳，誓言要為父親完成這「終身大事」：「嗰個女人用咗啲方法將我哋塊祖墓地『據為己有』，依家爸爸嘅骨灰雖然收藏得好好，不過人始終要入土為安，我點都要將爸爸同爺爺佢哋葬埋一齊㗎！」雖然成為被告，但她竟表示同情「保母」：「佢讀書唔多，加上係法律文盲而且貪心，對我嚟講只係得啖笑。今次件事反而令我、繼母同細佬關係緊密咗，之前我哋去唔同地方為爸爸搞身後事，感覺好似去咗家庭旅行咁。」
重投工作創30億點擊
由於現時已不用全副心神照顧父親，Michelle明言可以「復出」，希望再憑有品質的影視作品回報觀眾多年來的愛戴。談到近日她參演的短劇《少夫人來自東北》大受歡迎，總點擊量衝破30億，她說：「開播翌日我哋已經決定拍續集，5月左右應該會去東北開鏡，消息公布後預約人數已經超過500幾萬。今次台前幕後好齊心，有信心發展落去會成為小品，甚至去非洲及歐洲取景都有可能。（依家有啲乜要準備？）做多啲運動，東北真係好凍㗎！」
《少》劇講述的文化差異，其實亦是Michelle初出道的寫照，她憶述：「拍《廟街孖兄弟》時，我啲廣東話唔係好正，成日畀拍檔笑我，佢話：『我唔笑你，你又點會改？』諗番轉頭真係要感激對方，拍完成套劇之後，我就講到純正廣東話喇。」及後她轉戰影壇，更曾出戰康城及威尼斯影展，但當時發生不快事：「有時尚品牌贊助我行紅地氈，佢哋嘅大中華區董事長好支持我，但有員工形容我『娘娘哋』，想煞停贊助，好彩董事長依然堅持贊助，我哋到依家都係好朋友。」
