謝霆鋒港大分享「推倒重來」價值觀 寄語年輕人：玩AI都要有自己嘅Experience.謝霆鋒獲香港大學未來媒體學院邀請，尋日出席「創意．娛樂．創業：鋒味創新融匯」主題講座，同大家分享佢橫跨演藝、餐飲、科技、商業等多個領域嘅歷程同創新思考。講座由該學院總監及教授（實務）楊紫燁（Professor Ruby Yang）同霆鋒對談，之後仲有問答環節，等霆鋒現場回答同學問題。
霆鋒喺講座上透露，自己喺唔同範疇嘅思考模式非常相似，尤其係創意方面。佢舉例：「對我嚟講，寫歌嘅第一步係先收集音符；準備一道菜嘅話，就需要先收集食材，然後一步步諗點樣搭配。」佢進一步解釋，第二步就係確定想做乜嘢風格或菜系：「煮嘢食嘅話，你會問自己：『我想做福建菜定係泰菜？定係想做麻辣風味？』音樂方面就係揀邊種類型，你想做 Heavy Metal、Rock 定係 Jazz？呢一步就好似揀定個大方向，之後從中再發揮。成個思維路徑都係一脈相承。」
霆鋒特別提到歌曲《推倒重來》，有感而發話現今正處於文化、科技與人性嘅交匯點。AI發展速度以指數級增長，幾乎每星期都有新突破，令所有事情都要「推倒重來」。佢更觀察到，就連價值觀都正在被挑戰：「以前大人教我哋要努力工作、努力讀書先有美好未來，但而家有人話工作只係其中一個選項，甚至未來可能根本冇工做。咁我哋仲點解要咁努力工作？呢個就係價值觀被重新審視、改變嘅過程。」
霆鋒又自爆一個十幾年前被視為「黐線」嘅想法。佢話自己曾經營運電腦特效公司，經常掃描自己嘅樣貌製作數碼版本。有次掃描時突然靈機一觸，同經理人Mani講：「如果英皇娛樂十年後想繼續成功經營藝人管理部門，每個藝人都應該好似我咁樣scan自己個樣。」講到呢度，坐喺旁邊嘅Professor Yang突然拎起電話對住佢影相，仲話：「呢個係Best View！」全場大笑，連霆鋒都忍唔住笑出嚟。隨後霆鋒建議掃描唔同年齡階段嘅藝人，例如20到30歲嘅謝霆鋒同容祖兒，然後將數碼形象進行數位授權。
佢解釋：「我相信十年後、十五年後，人類已經唔需要再親自出鏡去拍廣告、拍電影。你諗吓，我拍好多動作電影，嗰啲場面連買保險都有困難。如果可以用數碼形象代替，就解決咗好多問題。」佢認為呢個做法同樣適用於運動員，等佢哋唔使擔心受傷或體能限制。
回想當年，霆鋒笑說：「當然，十幾年前我講呢啲說話嘅時候，所有人都覺得我好黐線。」但佢指出，時至今日大家已經歷NFT、Blockchain等概念洗禮，技術上完全做到。佢認為而家只差一步：「關鍵就係要睇吓邊個願意做嗰隻白老鼠，第一個去嘗試呢個新方向。」言下之意，呢個當年被視為天方夜譚嘅構想，隨時可能成為娛樂圈嘅未來趨勢。
霆鋒最後寄語大家：「當然大家要去擁抱、接受同埋點樣利用AI呢個科技，其實講到尾最令你難忘、最設身處地嘅嘢，就係要有自己嘅Experience。」
