专访丨宣萱轉性再闖情關：「一定會遇啱」 拍拖遭挑機收男友床照
.
入行30多年的宣萱憑着過往的經歷一步一步走來，性格上已抹去衝動，工作上待人處事的轉變明顯，愛情亦然！多次經歷感情失敗的她，試過接獲陌生者傳來男友的床照挑機，依然能夠冷靜應對，更揚言至今對感情生活依然有憧憬，但不強求婚姻。
藝人宣萱近日在無綫熱播劇《巨塔之后》扮演一名冷酷型格的心胸肺外科醫生，與上司鍾鎮濤結婚當晚，發現對方的手機上出現曖昧短訊，原來現實生活中她亦有類似遭遇：「收到陌生人傳嚟嘅一張相，我當時嘅男友同另外兩位女生喺張床上！」近年她學懂「冷靜的重要性」，當時拍醒身旁的另一半問清楚：「其實一睇已經知係舊相，因為相裏面佢比較瘦，後來肥咗啲。」她不得不承認以往在處理感情問題上較衝動：「所以當時覺得要講道理，況且（床照）都過咗去啦。以前拍拖我真係冇乜安全感，只會信自己。（有冇邊段感情因為衝動而失去咗，事後覺得後悔？）冇喎！極其量只會覺得可惜，我份人好信姻緣，係你嘅始終都係你！」
開番道門歡迎「年下男」
宣萱入行以來最令人印象深刻的戀情，相信是與張衞健拍拖兩年後和平分手，而近年外界經常「撥大葵扇」，希望撮合她與古天樂成為一對，令當事人啼笑皆非。踏入中年，宣萱依然憧憬愛情，但坦言還未遇上合適的：「我信一定會遇啱嘅，但又唔係想結婚，只係想有個伴啫。呢幾年遇到啲事，改變咗我一啲睇法，好似我同一個細12歲嘅男性朋友去滑雪，又溝通得到喎，呢件事提醒咗我要先開番道門，唔好抗拒『年下男』。其實我曾經同細過自己嘅男仔拍拖，發生咗啲唔愉快經歷。」
在感情世界裏，宣萱十分重視溝通，更坦言曾有朋友提醒她「釣金龜」，她豪言：「經濟上我可以照顧到自己喎，最緊要思想電波連接得到，對方唔使照顧我。（掉番轉呢？）如果同我溝通得到嘅，佢嘅性格一定唔會使女人錢！」她直言隨着年紀漸長，雙方都可能擔心對方有機心：「擔心你埋嚟係咪想攞嘢呢，所以要清晰自己想要乜，唔可以好似以前後生拍拖盲咗一樣！依家對我嚟講，拍拖最緊要大家開心，如果佢唔開心，淨係得我開心，我真係會選擇放手㗎。」
談到今次在《巨》劇扮演醫生，宣萱直言是懂性以來最夢寐以求的職業：「尤其呢個角色寫得好有血有肉，我好記得自己讀書時曾經因為計劃行醫，就去醫院參觀體驗吓，點知第一日就見到醫生喺病人嘅尾龍骨抽血淋淋嘅紗布出嚟，抽極都仲有喎，呢個時候護士問我有冇事，原來佢見到我塊面青晒！於是我問自己係咪真係想讀醫，學費好貴唔可以半途而廢，好彩我依家嘅職業可以畀我嘗試一下，哈哈。」
其實今次拍攝期間發生了不少問題及阻滯，曾有在場人士「食花生」問：「宣萱幾時開始鬧人？」她聞言笑說：「依家我學識咗，如果唔關自己事少講為妙，唔會衝出嚟話要幫人。之前我做咗個測試，發現自己改變咗，已經由E人變咗做I人喇！對我嚟講，最難一直都係人際關係，撞板係必經之路，每件事都有好有唔好，遇到唔好先知乜嘢係好，但我唔會扭曲真正嘅自己，亦慶幸身邊有班圈外摯友好了解我，適當時候聽我呻、畀我抖吓氣。」
TVB[超话]
