愛回家丨傳「風少」打毒針頻拆散人氣CP力谷「風素戀」？陳浚霆回應：一定係假.將於今年7月劃上句號嘅TVB處境劇《愛．回家之開心速遞》，播出近9年、超過2,800集，終於要同觀眾講再見。隨着停播日子逼近，一眾演員同劇迷固然萬般不捨，不過喺結局篇前夕，網上卻突然爆出一單「幕後黑手」傳聞，矛頭直指飾演「風少」龍璟風嘅陳浚霆，有網民喺Threads開post爆料，指控有人因為眼紅其他人氣CP受歡迎，就向高層「打毒針」，搞到多對CP黯然離開，更暗指呢位演員恃住屋企有強大嘅家族背景同財力，連公司內部都冇人敢得罪，只要睇邊個唔順眼，或者發現有同輩或後輩嘅演出太過搶鏡，就會喺背後做小動作削減對方戲份，藉此谷起自己嘅「風素戀」上位。
帖文一出，即時引嚟大批網民圍攻，有人直接將矛頭指向陳浚霆：「真係似足你風格呀，少爺仔。」、「又唔敢正面回應，又係度用陰招背後搞人acc。」同時，亦有人翻出多年來被拆散嘅人氣CP，包括「熊心如」蘇韻姿同「朱天梯」梁証嘉、「細龍生」鄭世豪同「細龍太」陳偉琪、「Mike」曾展望同「Candy」葉蒨文，甚至連「金城安」周嘉洛同「朱凌凌」吳偉豪呢對鐵膽都榜上有名，有網民直言：「我諗大家有目共睹整走咗佢哋邊個最大得益啦！」
面對突如其來嘅是非，陳浚霆未有選擇逃避，反而頻頻喺Threads留言同網民互動。日前佢喺個人社交平台開post問大家想睇佢開live做啲乜，隨即有網民留言叫佢「回應下傳聞你點解要踢走咁多人」，又有人話「希望最近傳聞係假，你同素素就趕客」。陳浚霆終打破沉默，親自回覆網友：「放心啦，一定係假，仲要假到不得了，所以唔會作出任何回應。多謝你支持，我會繼續努力做好自己本分。」短短幾句，雖然未有多加解釋，但態度堅定，似乎想以行動證明自己問心無愧。
其實陳浚霆嘅家庭背景一直被外界關注，佢爸爸係思科全球高級副總裁兼大中華區董事長陳仕煒，繼母係前藝人顧紀筠，家住山頂豪宅，名副其實嘅「富二代」。正因為家底雄厚，先令「少爺仔」呢個標籤揮之不去，今次傳聞一出，亦好快被網民同佢嘅背景聯想埋一齊。至於佢同古佩玲（素素）嘅「風素戀」，喺劇中由冤家變情侶，戲外亦屢傳緋聞，兩人更曾被影到十指緊扣出席活動，互動甜蜜，成為新一代人氣CP。不過有網民就直言，對「風素戀」唔多受落，認為陳浚霆同素素嘅感情線太過刻意，反而拖低咗佢嘅觀眾緣。
對於呢場「幕後黑手」風波，有支持陳浚霆嘅粉絲就留言力撐：「你絕對唔使靠旁門左道，觀眾睇到你努力㗎。」、「會一直支持你，每晚八點電視見。」陳浚霆亦以「Thank you！」回覆。TVB
