活塞繼續強大嘅壓迫力，湯臣（Ausar Thompson）盯死詹士夏登（James Harden），贊堅斯（Daniss Jenkins）則負責米曹（Donovan Mitchell），加上籃下嘅杜倫（Jalen Duren）力抗騎士雙塔，基本上就係如首戰一樣，封鎖咗騎士嘅進攻。
夏理士（Tobias Harris）喺第一節已經因防守米曹（Donovan Mitchell）而倒地，幸好冇咩大礙，今仗佢繼續成為「大腿」，攻入全場第二高嘅21分，前三節基本上就係由佢同鄧肯羅賓遜（Duncan Robinson）撐起；俾DR射入5球三分，而且部份更係因換防嘅溝通問題，相當致命。
第四節又成為球星嘅表演時間，根寧咸（Cade Cunningham）此節攻入12分，入楔中距離三分樣樣有，反觀騎士兩大王牌都攻唔入活塞防線，夏登尾後舉步維艱，史彼達雖能勉強起手，或搏到罰球，但威力有限，佢今仗有31分，但夏登繼續低迷，10分3助攻4失誤，好多時只能匆匆將球傳出，如非艾倫（Jarett Allen）努力喺籃下進攻，有22分及7籃板，騎士未必可以咬到最後。
活塞兩場主場全勝，就睇騎士之後如何調整，但兩日一場比賽，對夏登呢種年紀嘅球員來說，負荷極大，如果佢未能恢復體力，咁騎士恐怕會再一次喺次圈止步。
文章擇自- 仙道彬手記🏀
