姜濤承認曾虛報學歷 只讀到中一兼好曳：我話讀到中3其實係假.MIRROR成員姜濤今日（29日）於啟德體藝館舉辦27歲生日會，預祝4月30日生日。晚上8時，生日會正式開始，姜濤喺6500名「姜糖」面前，除咗唱出《追愛狂想》同台下互動，仲喺台上細說心聲，大方承認自己曾經講大話，虛報學歷。
姜濤坦言，自己喺小學同中學時期其實好曳，唔係好受人鍾意，更首度公開自己留過兩年班：「你哋知唔知我有留班？不過好多人唔知嘅係，我留咗兩年班。嗰陣時我唔好意思講，其實我讀到中一㗎咋，我喺以前嘅訪問入面話讀到中三其實係假嘅……你諗下中一嘅嘢有幾難，但我點讀都讀唔到。」佢又笑言台下觀眾讚佢都好叻，但自己當年真係讀唔上。
除咗學歷，姜濤仲提到自己人生中多個迷惘同崩潰時刻，其中一個就係年前嘅「掃掃掃」事件。佢話：「掃掃掃之前嗰段時間我已經開始崩潰，我做嘢會打玻璃、會鬧人、會對客人鬧。當時有人話唔好飄，但講真，咁快就紅，點會唔飄呢？但我感激身邊嘅人帶我返嚟。」佢用自身經歷勉勵大家：「無論幾艱難，你想放棄都好，要唔放棄真係好難，但我熬過咗。以後我會繼續發展，希望你哋信我。」最後佢唱出偶像羅志祥嘅《愛不單行》，為生日會劃上圓滿句號。
