王嘉爾（Jackson）嘅《MAGICMAN2世界巡迴演唱會2026-20

王嘉爾（Jackson）嘅《MAGICMAN 2 世界巡迴演唱會 2026-2027》先後走勻洛杉磯、奧克蘭、羅斯蒙特、紐約布魯克林，以及最多華人聚居嘅溫哥華同多倫多，六場騷全線爆滿，氣勢如虹。啱啱踏入32歲嘅Jackson狀態大勇，愈唱愈強，六場演出場場坐滿人。佢每場都實行大派福利，同粉絲台上互動嘅環節仲愈玩愈激，唔單止搞到班外籍女歌迷癲晒，就連有位男粉絲喺Jackson跳落台嗰陣攬實佢，激動到喊出嚟，場面好感人。Jackson每一場都出盡渾身解數，舞台魅力爆燈，成個場嘅氣氛熱到辣手。今次巡唱Jackson貫徹親力親為嘅作風，一個人孭起晒統籌同總監嘅工作，由服裝、排舞、舞台效果、燈光到場景設計，統統都有份參與，務求360度帶住觀眾走入佢內心嘅故仔，誠意攞滿分。《MAGICMAN 2》承接首部曲MM1嘅精神，情感厚度再升級，係一趟觸動心靈嘅沉浸式音樂旅程，剖白Jackson點樣走出人生低谷，重新出發。繼東南亞同北美合共十四場演出大成功之後，Jackson會帶住團隊移師拉丁美洲，踩入墨西哥城、聖保羅、里約熱內盧同聖地牙哥等城巿。Jackson話好期待繼續帶住全球觀眾，一齊行呢場探索內心嘅旅程。除咗用舞台同各地樂迷交流，Jackson亦落足心機籌備新音樂專輯同粉絲分享。全新大碟好快就會面世，當中仲會收錄一首喺Louis Vuitton 2026秋冬男裝騷首度曝光、由Pharrell Williams監製、Jackson feat. Pusha T嘅新歌《Sex God》。呢首係音樂同潮流icon聯手打造嘅匠心之作，各位拭目以待喇！ 王嘉尔多伦多演唱会发言