拉素係2017年2月之後，第一隊球隊喺意甲踢少兩個嘅情況下贏波。（對上一次係AC米蘭贏博洛尼亞）佢哋喺第42分鐘打少一個， 第77分鐘踢少兩個，但係9人應戰之後嘅5分鐘，路斯連（Tijjani Noslin）入波，1-0成功擊敗帕爾馬。拉素目前係今季意甲紅牌最多嘅球隊，總共有5張；賽前就同帕爾馬並列最多，有3張。路斯連今季聯賽未試過正選，但都有兩個入波。帕爾馬並未有好好利用人數優勢去組織攻勢，全場有5次中目標埋門，次數同拉素一樣。帕爾馬目前同比薩一樣，係今季入波最少嘅球隊，只有10個聯賽入波 。維羅納接連擊敗亞特蘭大同費倫天拿，搶到6分。以護級戰嚟講，呢場係幾多埋門同幾激烈嘅比賽，雙方加埋有33次攻門。基奧雲尼受傷35分鐘就提早離場，但後備入替嘅奧賓就成為維羅納嘅英雄，個人梅開二度，意料之外嘅換人反而收到奇效。維羅納再一次顯示佢哋嘅韌力，同頑強嘅生命力。19歲零350日嘅巴迪沙基（Davide Bartesaghi）成為AC米蘭近37年喺意甲入波最年輕嘅意大利後衛，對上一個係1988年，當時19歲零247日嘅保羅馬甸尼（Paolo Maldini）。紅黑軍團今季面對三支升班馬基蒙尼斯、比薩同薩斯索羅嘅比賽，都分別失咗兩球。薩斯索羅近六次聯賽作客AC米蘭只係輸過一場、另外和兩場，有三場贏波，賓拿蒙迪今場交出兩個助攻。費倫天拿整體發揮算係近期聯賽當中比較流暢嘅一場，不過盧卡雲尼亞里頭槌頂中楣，法基奧利射門又省中堅恩，古蒙臣糟蹋咗2 vs 2 嘅黃金機會，堅恩𢭃射出界，入波反而係靠對方嘅烏龍波，而紫百合兩個失波都可以避免。正選安排大致都正路，但換人有點混亂，巴利斯（Fabiano Parisi）結果係先踢左翼衛，再踢左中堅，最後又變返左翼衛；科天尼（Niccolo Fortini）只係踢咗30分鐘，但係就先踢左邊翼衛，再踢右邊；對古蒙臣最終踢足全場覺得意外。法基奧利有幾次長傳幾準，同堅恩呢一方面嘅配合唔錯。意甲第15週賽事賽果-萊切1-0 比薩拖連奴1-0 基蒙尼斯帕爾馬0-1 拉素亞特蘭大2-1 卡利亞里AC米蘭2-2 薩斯索羅費倫天拿1-2 維羅納烏甸尼斯1-0 拿坡里熱拿亞1-2 國際米蘭博洛尼亞0-1 祖雲達斯羅馬🆚科莫（稍後時間進行） 🇮🇹
