【明報即時】許紹雄設靈｜女兒許惠菁哽咽訴遺憾：唔夠時間畀我孝順佢許惠菁應承父親

【明報即時】許紹雄設靈｜女兒許惠菁哽咽訴遺憾：唔夠時間畀我孝順佢 許惠菁應承父親會代替他照顧媽咪及家人：「佢係我好引以為榮嘅爸爸。」（Ig圖片/劉永銳攝）許紹雄（Benz哥）喪禮今天（17日）下午假大圍寶福紀念館地下寶福堂設靈。Benz哥女兒許惠菁接受傳媒訪問，她說：「辛苦大家﹗其實呢段時間我都知對大家嚟講有啲突然，對我哋嚟講都突然同唔真實，但我想再次感激咁多位親友，呢段時間一路對我哋愛和陪伴，同埋一啲唔識朋友嘅關心，見到好多留言都好感恩，大家咁惜爸爸。我應承咗爸爸代替佢照顧媽咪及家人，佢係我好引以為榮嘅爸爸，佢好好，佢教咗我好多人生道理，我好記得佢同我講過，佢拍《新紮師兄》時候，其實1個月裏面，經歷咗我爺爺嫲嫲同埋佢自己姊夫離去，但佢冇麻煩過任何同事，冇停過廠，佢呢種負責任精神，同埋其他好好優點都會記住，我會繼續工作及好好生活，處理好爸爸嘅嘢，我會100%投入之前工作同埋照顧家人，好好生活下去。」問到媽媽心情如何，是否已平復？許惠菁說：「一時一時啦，我哋都仲接受緊。（爸爸臨終時有冇交低乜嘢說話？）我同佢在心中，咁多年嚟佢對我哋照顧同我哋嘅愛，唔使講啲乜嘢。（爸爸有冇遺言或想做嘅嘢？）佢不嬲好低調，佢對好多人幾好，有善心，𠵱家咁樣安排，雖然有啲突然，都係希望係佢想要嘅嘢。」許紹雄生前和愛女拍了不少短片，並放上社交平台，許惠菁說：「爸爸social media唔會close account，因為唔捨得咁做，同埋知道好多人會想繼續睇佢拍過及post過嘅嘢，多多少少仲有啲爸爸之前拍過嘅片，都想處理晒啲嘢，再同大家分享，希望佢開心形象會好好留喺大家心裏面。」問到爸爸情况轉差是何時的事？許惠菁說：「呢段時間對我嚟講都好唔真實，好多嘢都模糊，總之呢個News（新聞）咁震驚，家人朋友都仲接受緊，都係難接受嘅﹗」問到爸爸未能抱孫是否一個遺憾？許惠菁哽咽表示：「呢個的確係遺撼，爸爸好負責任﹑好有愛照顧我好多年，係遺憾唔夠時間畀我孝順佢。（有冇講過若有孫，會改乜嘢名？）冇，我爹哋好支持我想做嘅嘢，都係睇我㗎咋。我好proud of（感驕傲）有咁嘅爹哋，佢努力工作，對人處事嗰種真，嗰種care，我好proud of佢。」談到父女檔之前經常拍片，留下好多回憶，而社交平台對Benz哥來說也算是新鮮事，許惠菁說：「係呀，我爹哋都聽我話，同我有多啲experience，我細個時，佢忙做嘢，之後拍片一齊玩，呢啲experience好珍貴，算係彌補番少少之前錯過嘅時間。」（即時娛樂）